SAINTS OF DECEMBER: SAN NICOLAS
DISYEMBRE 6
SAN NICOLAS (ST.
NICHOLAS), OBISPO
A. KUWENTO NG BUHAY
Lalo ngayong magpa-Pasko na, kasama natin lagi ang diwa ng
santong si San Nicolas, ang dating obispo ng Myra sa Lycia, na ngayon
ay bahagi ng bansang Turkey. Ang sikat na Christmas character na si
Santa Claus ay hango sa totoong buhay ni San Nicolas. Si Santa
Claus ay mahal ng mga bata dahil naniniwala
sila na magpapamudmod siya ng mga regalo at pagkain sa Pasko. Ano ba ang kaugnayan ng character ni Santa Claus sa totoong obispo na pinagbatayan ng kanyang kuwento?
Si San Nicolas ay may isang tiyuhin na obispo na ang
pangalan ay Nicolas din. Dahil sa tiyuhin na ito, ang kanyang pamangkin na si
San Nicolas ay naging isang pari at pumasok sa monasteryo kung saan naging
pinuno siya doon ng mga monghe. Nang lumaon, si San Nicolas ay naging obispo ng
Myra. Isa siya sa mga dumalo at
lumagda sa dokumento ng “Council of
Nicaea” noong taong 325, kung saan ipinagtanggol ng mga Kristiyano ang
pananampalataya sa pagka-Dios ng Panginoong Hesukristo.
Bilang obispo, si San Nicolas ay bantog sa kanyang pagiging
simple at payak sa pamumuhay. Kilala rin siya sa kanyang pusong-bata, ibig
sabihin, walang muwang sa kasamaan at kasakiman, tunay na inosente sa
kasalanan.
Maraming kuwento tungkol kay San Nicolas na tumulong siya sa
mga nasasakupan niyang nagdarahop at naghihirap sa buhay. Ayon sa mga kuwento,
binigyan niya ng salapi ang tatlong babaeng mahihirap upang makapag-asawa sila
at upang hindi maging prostitute. Binuhay daw niya ang tatlong kabataan
na pinaslang. At iniligtas niya ang talong magdaragat o “sailors” mula sa kapahamakan sa gitna ng dagat.
Siya mismo ang nagdadala ng tulong sa mga nangangailangan. Ang pagiging bukas-palad niyang ito ang
simula ng lumakas nang lumakas na alamat tungkol sa kanyang pagbibigay ng
regalo o tulong sa mga bata.
Sa kanyang buhay, nagpakita din si San Nicolas ng tanging paglingap at
pagmamahal sa mga kabataan, kaya siya ay Patron
Saint ng mga bata.
Namatay si San Nicolas noong kalagitnaan ng 4th century, bandang taong 350, subalit buhay na buhay pa rin siya
ngayon sa pamamagitan ni Santa Claus na mahal na mahal ng mga bata sa
buong daigdig. Sinuman ang nakaisip
na gamitin ang diwa at buhay ni San Nicolas at gawin itong modernong Santa Claus ay dapat nating pasalamatan dahil patuloy nating binibigyan
ng halaga ang buhay ni San Nicolas.
Bilang mga Kristiyano, dapat lamang siguro nating ingatan na
sobrang ikabit sa ala-ala ni Santa Claus ang materyalismo ng panahon ng
Kapaskuhan, na kadalasan ay sobra-sobra na at nalalayo na sa tunay ng kahulugan
ng Pasko. Ingatan din natin na huwag matabunan ni Santa Claus ang misteryo
ng Anak ng Diyos na si Hesus, ang tunay at pinakamahalagang regalo ng Diyos sa
mundo. Bagamat sikat si Santa Claus, dapat ituro sa mga bata na ang
tunay na nagbibigay ng mga mabubuting bagay ay ang Diyos mismo at hindi si Santa Claus.
B. HAMON SA BUHAY
Tuwing magpa-Pasko ba ay handa ka na ring magbigay saya sa
iyong kapwa, hindi lamang sa pamamagitan ng mga materyal na bagay kundi sa
pamamagitan ng iyong pakikinig, pagbibigay ng oras, pagbabahagi ng talino at
lakas sa mga mahal sa buhay at sa mga nangangailangan? Kung meron tayong dekorasyon na Santa Claus sa bahay, opisina o paaralan natin, meron din ba tayong Belen
kung saan makikita ng lahat ang sentro ng Kapaskuhan na si Hesus?
Ngayong Adbiyento, mapaghandaan nawa natin na maging tulad
ni San Nicolas sa pagiging bukas-palad at matulungin.
K. KATAGA NG BUHAY
Mt 19: 13-14
May nagdala kay Jesus ng mga bata para ipatong niya ang
kanyang mga kamay sa kanila at madasalan. Pinagalitan naman ng mga alagad ang
mga taong may dala sa kanila. Kaya sinabi ni Jesus: pabayaan ninyo sila. Huwag
ninyong pigilang lumapit sa akin ang mga bata. Sa mga tulad nga nila ang
kaharian ng Langit.
