IKA-ANIM NA LINGGO SA KARANIWANG PANAHON A
SINASABI KO SA INYO…
May layunin ang bawat mabuting
balita. Nagsulat sina Mateo, Marcos, Lukas at Juan (maaaring sila ang tunay na
may-akda o iba na ginamit ang kanilang pangalan at impluwensya) ng buhay ni
Hesus upang magsaad ng mahalagang mensahe sa mga mananampalataya. Ito din
dahilan kung bakit hindi tinanggap ng simbahan ang mga “apocryphal or gnostic
gospels”, dahil nga hindi nila nasasalamin ang tunay na mensahe ng Panginoon
para sa kanyang mga alagad.
Si Mateo ay may malinaw na pakay
bilang manunulat. Nais niyang ipakilala si Hesus sa mga Hudyo at Hentil bilang
ang bagong tagapagbigay ng batas, mas mataas pa kay Moises, at may
kapangyarihang mula sa itaas. Ang Panginoong Hesukristo ang Tagapagbigay ng
Batas ng Bagong Tipan.
Sa mabuting balita ngayon (Mt 5),
nakikita natin si Hesus, sa halip na baligtarin ang batas na tinanggap ng mga
ninuno ng Israel, ay nagpapaliwanag ng bagong pang-unawa sa batas na ito. Sa
tulong nito, inaayos niya, pinadadalisay niya at pinalalalim niya ang Batas
ayon sa kanyang karunungan at kapangyarihan. “Narinig ninyo na sinabi” – iyan
ang lumang batas. “Ngunit sinasabi ko sa inyo” – iyan naman ang batas ni
Kristo.
Ang Batas ay ibinigay ng Diyos
kay Moises sa bundok. Kung tutuusin, hindi ito batas ni Moises kundi Batas ng
Diyos, at si Moises ay kasangkapan lamang. Kailanman hindi nagsalita si Moises
tulad ni Hesus, at kahit sino man sa Israel ay hindi rin nagawang magsalita ng
“sinasabi ko sa inyo” dahil takot silang mapagkamalan na nagnanakaw ng kapangyarihang
hindi sa kanila, lampas sa kanila at nararapat lamang sa Diyos. Dahil Anak ng Diyos, at kaisa ng Ama,
si Hesus ay makapagbibigay ng bagong mukha sa batas. At kung noong una, ang
batas ay naunawaan bilang marahas, nakakatakot at matindi, ngayon naman nais ng
Panginoong Hesus na maunawaan ang kanyang batas bilang daluyan ng pag-ibig,
pagkalinga at katapatan sa kalooban ng Diyos.
Hilingin nating matuto tayong
makinig kay Hesus habang nag-aanyaya siyang pahalagahan natin ang kanyang
batas. Gayundin, magkaroon nawa tayo ng biyayang sundin ang batas ng pag-ibig
sa pagsasabuhay nito sa ating mga sitwasyong kinalalagyan.
