IKA-WALONG LINGGO SA KARANIWANG PANAHON A
-->
BAWASAN ANG
PAG-AALALA
Ang galing siguro ng buhay na
walang alalahanin, yung parang hindi apektado ng problema, o pagsubok o ng
sasabihin ng iba. Pero tila ang konti naman ng mga taong ganito ang pananaw
araw-araw. Baka nga marami sa kanila ay manhid lang or iresponsable o walang
pakialam sa buhay.
Para sa marami sa atin, bawat
araw ay may dalang bagabag. Paggising pa lamang, paano ba lulutasin ang mga
hamon ng buhay? Mula sa pinakasimple hanggang sa pinakamahirap, puno ng
alalahanin ang buhay na nanghihingi ng ating atensyon, nakakabaliw sa isip at
nakakawala ng lakas.
Ang sarap tuloy pakinggan ang
sabi ng Panginoon sa mabuting balita: huwag kayong mabahala. Kahit ito man ay
pagkain, o kalusugan o kinabukasan, ang paanyaya ng Panginoon ay huwag
mabahala. Pero sa puso natin, may sumisigaw. Natural kasi ang mag-alala. Kung
hindi tayo mag-aalala, sino ang tutulong sa atin? Kung parang walang
nangyayari, e baka sayang naman ang buhay.
Subalit, hindi sinasabi ng
Panginoon na huwag tayong “magkaroon ng alalahanin.” Binibigyan niya tayo ng pormula
para malampasan ang “pagkabalisa ng puso.” Itaas daw natin sa Ama sa langit ang
lahat ng ito. Siya ang nagpapakain sa mga ibon sa parang, nagdadamit sa mga
damong ligaw, at nakakaalam ng pangangailangan ng kanyang mga anak. Oo nga at
bahagi ng buhay ang mag-alala. Pero sa halip na mabagabag, dapat tayong
matutong magtiwala at magsuko ng lahat sa Panginoong Hesus.
Bawat Misa ay pinakamagandang
panahon para magtiwala sa Diyos. Sinasabi sa atin lagi: Sumainyo ang Panginoon
– Ito ay pagsasaad ng ating pananampalataya sa Diyos na hindi nagpapabaya o
nang-iiwan sa gitna ng pagsubok. Dinadasal natin: Itaas sa Diyos ang inyong
puso at diwa – Gusto ng Diyos na dalhin sa kanyang mga kamay ang nagpapahirap
sa ating puso at nagpapabigat sa ating balikat. Bakit hindi natin hayaan ang Diyos
na patunayan ang kanyang pagmamahal at paglingap sa atin? Ihagis natin sa kanya
ang ating mga alalahanin. Mabuhay nawa tayong bawas sa bagabag at lumalago sa
tiwala at pagsuko sa Diyos.
