IKA-APAT NA LINGGO NG PAGKABUHAY A
-->
ISA LAMANG ANG
HUWARANG PASTOL
Matapos ang ilang Linggo na
nagninilay tayo sa mga pagpapakita ng Panginoong Muling Nabuhay, ngayon naman
ang sipi na pagninilayan natin ay hindi tahasang pangyayari sa Pagkabuhay. Sa
halip, ito ay isang katotohanan na kaugnay ng Pagkabuhay ng ating Panginoong
Hesukristo.
Sa Juan 10, inaangkin ni Hesus
ang sarili niya bilang huwarang pastol, ang tanging daanan ng mga tupa. Ang
hindi dumadaan dito ay tiyak na magnanakaw. Si Jesus ang pastol dahil inaakay
niya ang tupa sa pamamagitan ng pakikipag-usap sa kanila sa tinig na nakikilala
nila.
Alam natin na sa simbahan,
matapos ang Pagkabuhay at lalo na ang Pag-akyat sa Langit ng Panginoon, nabuo
ang mga balangkas ng pamumuno. Nagkaroon ng mga lider para gabayan ang mga
tagasunod ni Hesus. Ang mabuting balita ngayon ay isang pagtutuwid laban sa mga
panganib na dulot ng pamumuno.
Ang isang pinuno ay madaling
nagiging sikat sa buhay ng mga tagasunod. Lumalapit at humahanga sa kanila ang
mga tao. Dahil malapit sila sa mga tao, minsan tila para marating mo si Hesus,
ito ay sa pamamagitan lamang ng mga lider at ng mga gawain nila.
Pero ayon sa ebanhelyo, kahit may
mga lider sa ating pamayanan, si Hesus lamang ang dapat maging napakalapit sa
atin, kadikit natin, at hindi ang mga lider. Bakit? Dahil si Hesus lamang ang
nagdadala ng buhay ng Diyos sa atin. Ang mga lider natin ay tinaguriang pastol
pero huwag kalimutang iisa lamang ang banal na pastol, ang huwarang pastol, ang
mabuting pastol at iyan ay ang ating Panginoong Hesukristo.
Tahasang pagtuligsa ang mga
salitang ito sa mga lider ng mga Hudyo noong panahon ni Hesus. Pero paalala din
ito sa lahat ng mga Kristiyanong naglilingkod.
Sa ating mga simbahan, pamayanan,
paaralan, pagawaan, o pamilya, tayo ba ay may gampaning maging gabay ng ating
kapwa? Tulad ba tayo ni Hesus? O mas gusto nating “mamuno” kaysa mag-aruga? Gusto
ba nating ang “kapangyarihan” kaysa pagkakakilala sa mga pinaglilingkuran? Tayo
ba ay “taga-husga” ng iba sa halip na mahabaging pastol tulad ng nag-iisang
mabuting pastol?
