IKA-15 LINGGO NG KARANIWANG PANAHON B
IPAGPAG ANG SANDALYAS
Narinig natin ang mabuting balita
tungkol sa pagsusugo ni Hesus sa kanyang mga apostol. Nagbitiw siya ng mga payo.
Makikilala ang mga alagad sa kanilang pagsalalay sa biyaya, sa kanilang
kapangyarihang taglay, at sa kanilang habag sa mga maysakit at naghihirap.
Tila lamang may nakaka-intrigang
payo ang Panginoon: Kung hindi raw sila tanggapin o pakinggan, lumayo daw sila
at ipagpag ang sandalyas bilang hudyat laban sa mga kaaway. Tila paghahanda ito
sa pangyayari ng pagtuligsa at pagtataboy na magaganap sa mga alagad.
Tila wala namang alagad na
sumunod sa payong ito, at hindi dahil sinuway nila ang Panginoon. Sa kanyang sariling
buhay, si Hesus mismo ay hindi umurong sa anumang hamon o laban. Madiin niyang
sinuong ang mga lugar na nais niyang iligtas. At kung kailangan man siyang
umalis, hindi niya ipagpag ang sandalyas niya. Si Hesus ang modelo ng mga
apostol sa lubos na pag-aalay ng sarili, na nagpatawad sa mga nagmatigas at
umunawa pa sa mga hindi handa sa kanyang mensahe.
Kaya nga, eto ang mga apostol at ang
mga sumunod sa kanila na matapang na tumanggap din ng pait ng pagtataboy at
maging ng pagtuligsa habang umiwas na talikuran na lamang ang mga taong nais
nilang paglingkuran. Maraming mga Kristiyano noon at ngayon ang nagdanas o
dumaranas ng pagiging martir at
tumatangging suklian ng masama ang ginagawa ng kanilang mga kaaway.
Ang magiting na kilos ni Hesus at
ng mga alagad ay makikita pa rin ngayon sa mga Kristiyano, bagamat iba ang situwasyon
at mga pangyayari. Hindi iniiwan ng isang lalaki ang kanyang asawang
nagmistulang gulay dahil sa karamdaman. Malayang pinakawalan ng isang kabataang
lalaki ang kanyang mga pangarap upang
itaguyod muna ang buhay ng mga kapatid. Isang musmos na babae naman ang handang
iwaksi ang kanyang pagkabata sa pagtulong niya sa nanay niyang single mother sa
pag-aalaga sa mga kapatid at pag-aasikaso sa bahay. Sila rin ay hindi nagpagpag
ng kanilang mga sandalyas kundi lalong hinarap ang napipintong mga pagsubok.
Sa harap ng kagipitan, nasa atin
na kung maga-alsa balutan at lalayas. At minsan maaari din naman itong gawin
ayon sa Panginoon. Pero tulad din niya, mas naisin natin nawa na manatili,
magpunyagi at patuloy na ibahagi ang pagmamahal ng Diyos.
