IKA-16 NG LINGGO NG KARANIWANG PANAHON B
KONTING PAHINGA NAMAN
Pasyente: Doc, ano ba ang
mairereseta mo sa sakit ko? Doktor: Sundin mo ito - 1 linggo sa Palawan, 3 araw
island hopping, panonood ng paglubog ng araw sa baybay dagat, hiking sa bundok,
chill out sa coffee shop. Balik ka matapos ang isang buwan.
Tulad ng doctor si Hesus nang
magbalik ang mga isinugo niyang alagad matapos ang kanilang misyon. “Pumaroon
kayo sa isang ilang na lugar at magpahinga sandali.” Namangha at nabigla sa
tagumpay at kapangyarihang ibinahagi sa kanila ni Hesus ang mga alagad. Subalit
higit sa lahat, ang inaalala ng Panginoon ay ang mabuting kalagayan nila. Nais niya
silang mapahinga, magpalakas, makapaglimi, at higit sa lahat, makapagdasal.
Nabubuhay tayo sa panahon ng
istres at sa mundong tensyonado. Nanlulupaypay ang mga bata dala ng istres. Nagluluko
ang mga kabataan upang ilabas ang tensyon. Ang mga matatanda ay nakakaramdam ng
pagka-upos o burn-out. Kay daming namatay na sa istres at kalumbayang di
maipaliwanag o depression. Tunay ngang kailangan ng lahat ng pahinga sa
nakapapasong bigat na dulot ng eskuwela, tahanan, at mga ugnayang personal
natin.
Kailangang matuklasan kung paano
ikasiya ang buhay. Dapat matutunang lumutang sa gitna ng mga problema. Sa halip
na magupo tayo, ang mga pinagkakaabalahan at mga pakikipag-ugnayan araw-araw ay
dapat magbunga ng mas masaya, mas mayaman, at mas mabuting katauhan. Habang nagreremedyo
ang mga propesyunal at mga tagapayo ng iba’t-ibang programa ng therapy at
wellness, ang Panginoon naman ay may handog na lunas – “ang ilang na lugar”
kung saan titiwasay ang katawan, isip at kaluluwa. Ang disyertong ito ay ang panalangin
at ugnayan sa Panginoon.
Makabubuti kung makadadalo tayo
ng mga rekoleksyon o retreat, pero hindi madali ito para sa marami sa atin. Ang
pagdarasal, kapag nakagawian, ay tunay na madaling gampanan bukod sa libre pa
at walang bayad. Kailangan lamang masumpungan ang payo ni San Francisco de
Sales: “Magkubli sa inyong puso paminsan-minsan, kahit pa nasa gitna ng
pakikipag-usap o pakikipagtalakayan sa kapwa, at makipag-usap sa Diyos.”
Sundin ang payo ng doktor. Isagawa
ang tagubilin ng counselor. Higit sa lahat, tupdin ang paghimok ni Hesus –
hanapin ang ilang na lugar sa iyong puso at magpahinga sa kanya.
