SAINTS OF JANUARY: SAN VICENTE, DIYAKONO
ENERO 23
SAN VICENTE,
DIYAKONO (DEACON)
AT MARTIR
A. KUWENTO NG BUHAY
Ang ating bayaning ito ng pananampalataya ay isang mamamayan
ng bansang Spain at doon nagsimula at
natapos ang kanyang buhay.
Ipinanganak si San Vicente sa Huesca, Spain at nang lumaki ay naging isang diyakono (tulad ni San
Esteban sa Gawa ng mga Apostol) sa simbahan ng Saragossa, Spain.
Nagbuwis siya ng buhay para sa pananampalataya niya kay Kristo sa
lungsod ng Valencia, Spain noong
Enero 22, 304. Siya ay nagdusa ng pag-uusig sa ilalim ng Emperador Diocletian at Maximian.
Ayon sa salaysay ng kanyang kamatayan, pinarusahan siya ng
katakut-takot na pahirap sa katawan subalit matapang niyang pinagsabihan ang
nagpaparusa sa kanya. Buong tapang
niyang kinausap si Dacian, ang
gobernador ng Spain noong panahong
iyon, sa ganitong pananalita: “Lalo kong nasasaksihan ang galit mo, Dacian, ay lalong lumalakas ang aking
kasiyahan. Huwag mo nang isiping bawasan pa ang paghihirap na inihanda mo sa
akin nang sa gayon, lalong maging maningning ang aking tagumpay.”
Kaya pati ang nagpaparusa kay San Vicente ay namangha sa
kanyang taglay na kagitingan at iniutos niyang tigilan na ang parusa kay San
Vicente, bigyan siya ng mahihigaan at nang sa gayon ay unti-unting magkamalay
at gumaling. Pero hindi ito
tinanggap ni San Vicente. Siya ay isang kawal ni Kristo at balewala ang kanyang
buhay kung hindi naman siya patuloy na makapagbibigay saksi sa Panginoon.
Matapos ang marami pang torture
na pinalasap sa kanya, na tila hindi mawari ng isip ng tao sa tindi, pumanaw
siya at pumasok ang kanyang kaluluwa sa kaluwalhatian ng langit.
Tatlong mahahalagang diyakono ang pinarangalan ng simbahan
mula pa noong una. At ang tatlong ito ay mga diyakono mula sa ibat-ibang lugar:
si San Esteban ng Palestina (Israel),
si San Lorenzo ng Roma (Italy) at si
San Vicente ng Valencia (Spain).
Nabanggit ng makatang si Prudentio ang buhay ni San Vicente.
Si San Agustin naman ay laging nangangaral tungkol sa kanya tuwing kanyang
kapistahan. Binigyang-diin ni San Agustin na si San Vicente ay nagsabuhay ng
pangako ng Panginoon sa Mabuting Balita ni San Mateo. Sa iisang katawan ni San Vicente, tila daw dalawang tao ang
nagbigay ng saksi sa Diyos – ang isang katawan ay pinahihirapan sa torture at ang isang katawan naman ang
nagsasalita laban sa nagpapahirap sa kanya. Ang katawan ni San Vicente ang nagdurusa pero ang Espiritu
Santo naman ang nagbibigay saksi sa kanyang pananampalataya.
Sa Paris, France pinararangalan ang ala-ala ni San
Vicente sa simbahan ng St. Germain dahil minsang inilagak sa
simbahan na ito ang damit o istola ni San Vicente.
B. HAMON SA BUHAY
Tandaan natin na ang katuwang natin sa ating mga pagsubok sa
buhay ay walang iba kundi ang Diyos Espiritu Santo. Ipagkatiwala natin sa kanya ang ating sarili kapag tila
hindi na natin kaya ang mga problema ng ating buhay. Bibigyan Niya tayo ng
liwanag at tutulungang makalampas sa anumang hilahil at balakid. Lagi nating
dasalin: Halina, Espiritu Santo!
Maging malakas nawa ang ating loob sa pagsubok tuwing
maaalala natin ang buhay ni San Vicente.
K. KATAGA NG BUHAY
Mt.10: 19-20
Pag isinakdal naman kayo, huwag mag-alala sa inyong
sasabihin; sa oras iyo’y ibibigay nga sa inyo ang inyong sasabihin. Sapagkat
hindi kayo ang magsasalita kundi ang Espiritu ng inyong Ama ang magsasalita sa
pamamagitan ninyo.
(mula sa "Isang Sulyap sa mga Santo, by Fr. RMarcos)
