IKALAWANG LINGGO NG ADBIYENTO A
PROPETA?... IKAW YATA
YUN!
May nakakatawang pangyayari
matapos ang malagim na lindol sa Mindanao.
Kaydaming nasira. May mga nasawi
pa. Laganap ang takot.
At eto ang isang lider ng
relihyon (sabi ng iba, lider ng kulto) na nagsabi dapat siyang pasalamatan.
Bakit daw? E kasi siya daw ang nagpatigil
sa lindol!!!
Nang lumindol, narinig daw ng
iba, na sumigaw siya ng “Hinto!” at huminto ang lindol.
Pinagpiyestahan tuloy siya sa tv
at internet.
Di ba, talaga naman humihinto
agad ang lindol matapos ang ilang minuto, o segundo pa nga?
Ano ang nasa isip ng lider na
ito? Nais niyang ituring siyang propeta, ganun yun! (Sa totoo lang , sabi niya,
siya na daw ang bagong Anak ng Diyos!).
Sino ang propeta? Ano ang misyon
niya? Bakit mahalaga siya sa panahong ito ng paghahanda sa pagsilang at muling
pagdating ng Panginoon?
Si Juan Bautista ang siyang tunay
na larawan ng propeta ng Diyos.
Nangaral siya ng pagsisisi, hindi
galit, para sa mga taong nais niyang maituwid at maligtas.
Itinuro niya, hindi ang sarili,
kundi ang Panginoon na nagpadala sa kanya sa misyon.
Handa siyang maglaho kapag
nariyan na ang Panginoon na makikipagtagpo sa kanyang bayan.
Ang kapangyarihan ni Juan ay
hindi magsabi ng “Hinto!” sa kalamidad,
Kundi, “Hinto!” sa kasamaan, at “Sulong!”
sa Panginoon na dumarating na.
Tinatawag ding “Kaibigan ng
Lalaking Ikakasal” si Juan dahil dito. Inihahanda niya ang babaeng ikakasal (ang Simbahan) sa
pagdating ng lalaking magiging kabiyak nito (ang Panginoong Hesukristo).
Ngayong Adbiyento, habang
naghahanda tayo sa pagdating ng Panginoon sa buhay natin, at sa Paskong ito,
“ikaw” mismo ang Inaanyayahan ng
Panginoon na maging isang propeta niya sa harap ng iba.
Ang daming taong naghahanap ng
presensya ng isang magpapa-alala sa kanila ng pagmamahal ng Diyos,
… isang taong tambak ang problema
… isang depressed na kabataan
…isang dukhang nasa lansangan sa
labas ng iyong bahay
…isang guard, janitor, driver na
nasasalubong mo tuwing umaga
…isang kasama mo sa bahay na
kailangan ang pagmamahal at pagpapatawad
…isang matandang nag-iisa na sa
buhay
at marami pang iba na malungkot
sa panahong ito ng kagalakan!
Puwede ka bang maging propeta sa
kanila at magsabi na
… “Hinto!” na ang iyong
kalungkutan, narito ako sa tabi mo
… “Hinto!”na ang iyong pag-iisa
dahil sasamahan kita
… “Hinto!” na ang mga luha,
pangingitiin kita?
Hangad ni Hesus na maging propeta
ka ngayon. Handa ka bang magsabi ng “Hinto!” sa iyong pagkamakasarili at buksan
ang puso mo sa hamon na ito?
(paki-share sa mga kaibigan... God bless!)
