IKA-12 LINGGO SA KARANIWANG PANAHON B
BAKIT KA NATATAKOT?
Kuhang-kuha ng Mabuting Balita ngayon ang ating
pagkatakot sa bagay na hindi natin alam. Ang mga alagad ay natakot mamatay sa
gitna ng bagyo sa dagat. Si Hesus naman, ay tila walang pakialam sa unos, tulog
na tulog na parang isang bata sa gitna ng malakas na hangin at ulan.
Ano
ba ang sanhi ng ating takot? Ito ay ang ating insecurity o kakulangan ng
katatagan sa buhay. Tatangayin ba ng baha ang aming barangay? Tatama ba sa
ating bayan ang lindol? Okey lang ba ako na tumawid ng kalsada? Baka ipagpalit
ako ng asawa ko sa mas bata at mas mayaman? Kaya ko bang mabuhay na mag-isa?
Kung
secure tayo, kung matatag ang ating daigdig tayo ay payapa; ang buhay natin ay
ligtas, ang kinabukasan natin ay nasa tamang direksyon, at lagi tayong magiging
matapang at malakas ang loob. Pero
kalimitan, hindi natin talaga alam kung ano ang naghihintay sa atin sa banda pa
roon.
Natagpuan
ni Hesus ang kanyang katatagan sa kanyang Ama. Palagay ko hindi ito tiwala
lamang sa kapangyarihan ng Ama na lupigin ang mga puwersya ng kalikasan. Hindi
rin ito dala ng kasiguraduhan na ililigtas siya ng Ama sa bawat panganib.
Para
kay Hesus, ito ay isang pagkabatid na mas personal, mas mulat, mas malakas. Walang
takot si Hesus sa anuman dahil nakasalig siya sa dakilang pag-ibig ng Ama. Ang ibang
mga bagay – mga pangangailangan, tirahan at pagkain, kaligtasan – ay naging
pangalawa na lamang. Ang higit na mahalaga ay alam niyang mahal siya ng Ama sa
isang malalim at tunay na paraan. Lahat ng takot ay natutunaw sa gitna ng
ganitong banayad at mabuting pag-ibig.
Ngayong
linggo, maglaan ng oras upang harapin ang iyong mga takot. Itapon mo sa harap
ng krus ang mga ito. Ihagis mo sa harap ng altar habang nagsisimba ka. Itaas mo
ang mga takot na ito sa Panginoon sa iyong pagdarasal. Isuko mo lahat sa tunay
na nagmamahal sa iyo.
Maniwala
ka, sapat na ang pag-ibig ng Diyos upang wasakin ang iyong mga takot sa buhay…
