ANG PAG-AKYAT SA LANGIT NG PANGINOONG HESUKRISTO, B
LABAN NI
HESUS, LABAN NATING LAHAT
Halos makabisado na natin ang
motto ng pinakahuling laban ni Manny Pacquiao: Laban ni Manny, laban ng
Pilipino. Tagumpay ni Manny, tagumpay ng bayan! Pero totoo nga bang ang panalo ni Manny ay panalo nating
lahat? Sana lang, pati ang kita
niya sa ring makarating sa bulsa ng mga dukhang grabe ang paghanga sa kanya.
Nandito na tayo sa huling yugto ng
misteryo ng Pagkabuhay ng Panginoon. Ngayon ang Kapistahan ng Pag-akyat niya sa
kalangitan. Tapos na ang kanyang buhay makalupa at ngayon ay panahon na upang
muli niyang lasapin ang buhay na kasama ang Ama bago pa likhain ang mundong
ito. Bumalik na si Hesus sa langit.
Ang Pag-akyat sa langit ay paalala
sa atin na ang laban ni Hesus para sa kabutihan, sa paglilingkod, sa
kaligtasan, sa katuwiran sa harap ng Diyos at sa pakikipagkaisa sa ating kapwa –
ay laban din nating lahat. Ang kanyang buhay, kamataya, at luwalhati ay
dumadaloy sa buhay ng sangnilikha, lalo na sa buhay ng mga nananalig sa kanya.
Sa Pag-akyat sa langit, itinampok
ng Diyos ang kanyang Anak. Subalit itinatampok din niya tayong lahat dahil
sinasabi niya sa atin na kaya napagtagumpayan ni Hesus ang mga pakikipagbuno
niya sa daigdig na ito ay upang magwagi din tayo sa ating mga pakikibaka at
makarating sa makalangit na gantimpala.
Ang Pag-akyat sa langit ang pintuan sa isang tunay at buhay na kaugnayan
sa Diyos na nagpapabago sa lahat ng ating mga ugnayan sa mundong ito.
Nakikita natin si Hesus na
umaakyat sa langit na makapangyarihan. Pero huwag nating kaligtaan na habang
umaakyat siya, ibinabahagi niya ang kapangyarihan sa mga alagad: “…tatanggapin
ninyo ang kapangyarihan kapag dumating ang Espiritu Santo sa inyo… magiging mga
saksi ko kayo… hanggang sa dulo ng daigdig” (cf. Gawa 1: 1-11). Ngayon bahagi tayo ng kanyang
kapangyarihang magmahal, magpatawad, at maglingkod. Ngayon tayo din ay mga
saksi niya sa mundong ito. Ang Espiritung bumuhay kay Hesus ay nasa ating puso
din. Sa Mabuting Balita, Lk 24, binabasbasan ni Hesus ang mga alagad para
maging mabunga at makabuluhan ang kanilang gawain tulad ng sa kanya.
Nawa’y maranasan natin ang
kapangyarihan ng Diyos sa ating pang-araw-araw na buhay na puno ng kahinaan,
kamangmangan at kasalanan. Buksan nawa ng Panginoon ang ating mga mata upang
makita na ang kapangyarihan ni Hesus ay kasa-kasama natin araw-araw.
