IKA-11 LINGGO SA KARANIWANG PANAHON, B
ANG
SIMULA NG KAHARIAN
Malapit nang marating
ng isang kaibigan ko ang kanyang pangarap. Pero tuwing magku-kuwento siya, ang
lagi niyang paksa ay ang simula ng kanyang pangarap; paano, kailan, sino ang
mga naging bahagi ng pangarap niya.
At tulad ng lahat ng simula, ito ay nanggaling sa maliliit na bagay
lamang; sa mga mahihinang bagay lamang, sa mga mumunting bagay lamang. Mula
doon, naganap ang paglago at pagiging matibay ng pangarap na naabot niya
ngayon.
Sa pagbalik natin sa Karaniwang Panahon ng
simbahan, at sa karaniwang panahon ng ating buhay, ipinapaalala ng Diyos sa
atin ang kapangyarihan ng mga maliliit at simpleng bagay ng ating buhay.
Ang isang mayamang ani ay mula sa maliliit na
binhi na inihahasik sa lupa. Ang isang malaking puno, tulad ng mustasa sa
Mabuting Balita, ay nanggaling naman sa munting butil na halos hindi makita ng
mga mata. Oo, kahit ang Kaharian ng Diyos ay nagmumula sa mga hindi
kapansin-pansing mga bagay at mga paraan.
Huwag tayong matakot magsimula mula sa maliit.
Huwag nating iwasan ang maging hamak. Huwag nating iwaksi ang mga simpleng
bagay, ang mga bagay na tila walang kuwenta.
Hindi agad kumikilos nang malaki ang Diyos. Hindi
palaging bongga ang pagpasok Diyos sa ating buhay. Dinadalaw ng Diyos ang ating
buhay sa tulong ng mga maliliit na bagay lamang. May kapangyarihan sa mga
maliliit at hamak na tao, pangyayari, at kasangkapan sa ating paligid. Dito
nagmumula ang Kaharian ng Diyos.
Ano ang mga maliliit na bagay sa buhay mo ngayon?
Tanggapin mo at pasalamatan ang Diyos para sa mga iyan. Hilingin natin sa
Panginoong Hesus na gawing ang mga maliliit na bagay na ito na tuntungan ng
paglago at pagbabago at ng pagluwalhati sa Diyos mula sa ating puso.
