IKALAWANG LINGGO NG KUWARESMA B
-->
PANAHON NG MGA REGALO
Anong gagawin mo kung ang matagal
mo nang inaasam na regalo ay mapasaiyo na? Siguro, aariin mo itong isang
kayamanan higit sa lahat ng bagay, aalagaan nang matiyaga, at sisikaping
maipamana sa mga minamahal sa buhay.
Sa Lumang Tipan, wala nang higit
pang nakaunawa ng kahulugan ng regalo tulad ni Abraham. Sa tagal ng
paghihintay, sa wakas nagkaanak din silang mag-asawa sa katauhan ni Isaac – at
ito ay kahit matanda na sila ni Sara. Si Isaac ang katuparan ng mga pangarap ni
Abraham na salinlahi at pamana, mga pangako na Diyos mismo ang nagbitiw sa
kanya.
Subalit alam ni Abraham kung
paano kilalanin ang regalo. Natural na minsan siguro nais niyang ituring anak
bilang kanyang eksklusibong pag-aari. Nais niya itong pangalagaan at tulungan.
Marami siyang plano para sa kanya. Ngunit nang kabigla-biglang hiningi ng Diyos
na ialay bilang sakripisyo ang bata, pinigil ni Abraham na ipagdamot ang anak.
Buong laya, kahit masakit, inialay niya ang anak bilang regalo din sa Diyos.
Tinanggap bilang regalo, ibinabalik bilang regalo din.
Sinusubok lamang pala ng
Panginoon ang katapatan at pagkamasunurin ni Abraham. Sa pagsasauli niya ng
regalong-anak, isinauli din niya ang kanyang pagka-ama, ang kanyang mga
pangarap, ang kanyang mga balak. Masakit kaya iyon! Pero, nakita ni Abraham na
ang Tagapagbigay ng regalo ay higit sa regalo, at nagtiwala siya kahit hindi
niya nauunawaan lahat ang hinihingi ng Diyos sa kanya.
Si Isaac ay sagisag ni Hesus.
Anak ng Diyos, siya ang pinakamataas na regalo para sa mundo. Si Hesus din, ay
hindi nagdamot ng kanyang buhay. Hindi niya pinamayani ang sariling udyok sa
kanyang kinabukasan. Sa halip, malaya niyang inialay lahat sa krus, bilang
regalo sa Ama at Tagapagligtas ng kanyang mga kapatid na makasalanan. Tulad ni
Abraham, hindi kumapit si Hesus sa anuman, kahit sa sariling kagustuhan at
buhay, kundi isinuko ang lahat sa ngalan ng pagmamahal.
Ngayong Kuwaresma, makatutulong
na silipin muli kung ano sa ating buhay ang nagiging sanhi ng pagiging
nakagapos, nakatali, at hindi malaya. Materyal na bagay ba? O dangal at papuri
ng iba? O hindi kaaya-ayang ugali at asal sa kapwa? Tinuturuan tayo ni Abraham
na kilalanin lahat bilang regalo at dahil dito maging malaya din sa pagsusuko
at pag-aalay ng mga ito sa Diyos na nagbibigay ng lahat ng mabubuting bagay.
