DAKILANG KAPISTAHAN NG SANTISSIMA TRINIDAD, JUNE 15

-

ANG BUHAY NATIN AY KAUGNAY NG BUHAY NG DIYOS

Ano ba ang katangian ng Kristiyanismo na nagbubukod dito sa ibang mga pananampalataya sa daigdig?  Ang mga Muslim, Hindu, Buddhists naniniwala sa Diyos.  Pero iba pa rin ang larawan ng Diyos para sa isang Kristiyano.  Nababanaag ito sa panalangin ng isang Katoliko:  Sa ngalan ng Ama, Anak at Espiritu Santo.  Iisang Diyos subalit tatlong pangalan ang tinatawagan - Ama, Anak at Espiritu Santo.

Iisang Diyos sa tatlong Persona.  Tatlong Persona pero iisang DIyos, hindi tatlo.  Tila nakakalito at mahirap maunawaan. Kaya nga, hanggang ngayon, maraming tao ang hindi makapaniwala sa doktrinang tinatawag nating Santissima Trinidad.  Ang mga kapatid nating Muslim, hindi naniniwala.  Ang mga Mormons, may maling paliwanag.  Ang mga Iglesia, tumatanggi dito.  Minsan may nakaharap akong isang kabataan na pilit inuunawa ito ngunit hindi niya matanggap.  Nag-aaral siya ng mathematics at paano nga ba mangyayari, sabi niya na ang 3 = 1 at 1 = 3.

Paano nga kaya uunawain ang doktrina na ating ipinagdiriwang ngayon?  Lagi kong sinasabi na ibang magbilang ang Diyos.  Dahil ang kanyang mathematics ay hindi  nagaganap sa utak.  Ito ay nagaganap sa puso, sa larangan ng pag-ibig.  Halimbawa, paano nga bang mangyayari na iiwanan ng pastol ang 99 na tupa para sa isa; paanong ang 1 tupa ay magiging mas mahalaga pa sa 99 na naiwan sa bukid?  Iba talaga.

Kaya nga hindi sa larangan ng bilang mauunawaan ang doktrinang ito.  Ito ay magiging malinaw kapag natanggap natin na ang Diyos ay pag-ibig.  At ang pag-ibig ay hindi nag-iisa kundi laging naghahanap ng pag-aalayan ng pagmamahal.  Tulad ng isang pamilya:  may lalaking sumisinta at may babaeng nagmamahal din.  At ang kanilang pagmamahal ay nagbubunga ng mga supling na magpapatuloy ng pagmamahal.  Ang Diyos ay Trinidad dahil siya ay pag-ibig; siya ay pamilya ng Ama, Anak at Espiritu Santo.

Subalit ang pamilyang ito na tinatawag na Trinidad ay hindi nakakulong lamang sa kanilang sarili.  Ang pagmamahal ng Diyos ay umaapaw hanggang sa lupa, sa ating lahat.  Tayong lahat ay bahagi ng buhay ng Diyos.  Naranasan natin ang Ama, dahil tayo ay kanyang mga anak.  Nararanasan natin ang Anak, dahil siya ay ating kapatid.  Nararanasan natin ang Espiritu dahil tayo ay templo ng Espiritu. Kasali tayong lahat sa buhay ng Diyos, sa buhay ng Santissima Trinidad.

Isang mabuting halimbawa nito ay ang Mahal na Birhen.  Sa kanya ay buhay na buhay ang kahulugan ng Santissima Trinidad – Anak ng Ama, Ina ni Hesus at Esposa ng Espiritu Santo. 

Para maunawaan natin ang Trinidad, kailangan nating buksan ang ating puso sa Diyos na nagmamahal at padaluyin natin ang kanyang pagmamahal sa ating mga puso.  Kailangan nating isabuhay ang pagmamahal sa kapwa upang patuloy na kumalat ito sa lahat ng tao.  Sa gayon, ang doktrina ay hindi lamang mananatiling isang kaisipan lamang.  Kundi patuloy tayong magiging bahagi ng daloy ng pagmamahal ng Ama, Anak at Espiritu.

Popular posts from this blog

HOLY MASS IN FILIPINO (TAGALOG)

-
Image
ANG BANAL NA MISA PAMBUNGAD NA AWIT Pari:    Sa ngalan ng Ama, at ng anak, at ng Espiritu Santo. Bayan: Amen P.         Sumainyo ang Panginoon. B.        At sumainyo rin. P.         Mga kapatid, aminin nating ang ating mga kasalanan upang tayo’y maging marapat sa pagdiriwang ng banal na paghahaing ito.             Sinugong Tagapagpagaling sa mga nagsisisi,             Panginoon, kaawaan mo kami. B.        Panginoon, kaawaan mo kami. P.        Dumating na Tagapag-anyayang mga makasalana’y magsisi,             Kristo, kaawaan mo kami. B.         Kristo, kaawaan mo kami. P.         Nakaluklok ka sa kanan ng Diyos Ama para ipamagitan kami             Panginoon, kaawaan mo kami. B.         Panginoon, kaawaan mo kami. P.         Kaawaan tayo ng makapangyarihang Diyos,             Patawarin tayo sa ating mga kasalanan,             At patnubayan tayo sa buhay na walang hanggan. B.        Amen. GLORIA/ LUWALHATI
Read more

GOMBURZA: BAKIT MAHALAGA?

-
Image
      PADRE MARIANO GOMES  (Gomez, ayon sa kanyang orihinal na apelyido)       Isinilang si Padre Gomez sa Santa Cruz, Maynila noong Agosto 2, 1799. Itinuturing siyang isang tornatrás o torna atrás o iyong may magkahalong dugo na Indio, Intsik at Kastila; karaniwang ang ama ay Kastila at ang ina ay mestisang Intsik. Ang kanyang mga magulang ay sina Alejandro Francisco Gomez at Martina Custodio.   Pumasok siya sa mga paaralang Letran at UST. Naghanda naman siya sa pagpapari sa Seminaryo ng Maynila na ngayon ay San Carlos.   Taong 1824 nang maging parish priest si Fr Gomes ng Bacoor, Cavite. Nakakitaan siya ng kasipagan sa pag-aalaga sa espirituwal na kabutihan ng mga tao, gayundin sa pagtuturo sa kanila ng kabuhayan at ng agrikultura. May maganda siyang pakikitungo sa mga kapwa pari. Kabilang siya sa mga nasyonalistang pari na nakikipagbuno para sa pantay na karapatan at pagkilala sa mga paring secular (o iyong hindi miyembro ng mga religious order tulad ng Dominicans, Franc
Read more

ANG 12 BUNGA (MGA BUNGA) NG ESPIRITU SANTO

-
Image
    Ano ang pagkakaiba ng BUNGA ng Espiritu Santo sa mga KALOOB ng Espiritu Santo? Ang mga Kaloob (7 Gifts of the Holy Spirit, Is. 11: 2-3) ay mga mabubuting katangian na dulot ng Espiritu Santo sa ating kaluluwa (virtues sa Ingles, tulad ng theological virtues na pananampalataya, pag-asa at pag-ibig). Ang mga Bunga   (Gal 5:22-23) naman ay mga mabubuting kilos na nagmumula sa mga Kaloob na ito. Namumunga tayo ng kabutihan dahil Espiritu Santo, sa ating pagkilos at pagsasabuhay ng pananampalataya sa mundo. Nagagawa natin ito dahil sa tulong ng Espiritu Santo. Ang presensya ng mga Bunga ng Espiritu Santo sa ating buhay ay patunay na nananahan sa atin ang Espiritu ng Diyos. Ayon sa Gal. 5, may 9 na bunga ang Espiritu Santo sa atin: “Subalit ang bunga ng Espiritu ay pag-ibig, kagalakan, kapayapaan, pagtitiyaga, kabaitan, kabutihan, katapatan, 23  kahinahunan, at pagpipigil sa sarili. Walang batas laban sa mga ganito. ” Subalit sa tradisyong Katoliko, itinuturo na ma
Read more