IKA-31 LINGGO NG KARANIWANG PANAHON A
HUWAG GAYA-GAYA
Biglang napasigaw ang
nanay ng estudyanteng napatalsik sa pamantasan dahil siniraan at
dinungisan niya sa social media ang pangalan ng mga guro niya: Hindi
ba sabi kong tigilan mong gayahin yang Vice Ganda na yan? Walang
maidudulot na maganda ang pagsunod at panggagaya mo sa kanya!
Isa pang kabataan ang
habang pinagagalitan ng kanyang mga magulang dahil sa pagmumura sa
kaibigan niya sa social media din, ang nangatuwiran: kung ang
presidente nga ng Pilipinas laging nagmumura, ako pa ba ang hindi
puwede?
Ang Mabuting Balita ay
halaw sa bahagi ng sulat ni Mateo laban sa mga Pariseo. Ang buong
kabanata 23 ay totoong marahas sa tono kaya ang unang bahagi lang ang
binasa natin. Malinaw sa mga salita ng Panginoon na may paggalang
siya sa katungkulan ng mga eskriba at Pariseo, na mga institusyong
mahalaga noon sa lipunan. Pero pinag-iingat ng Panginoon ang mga
tagapakinig niya sa halimbawa ng mga pinunong relihyoso. Ang kanilang
mga turo ay tama at ayon sa tradisyon ng Israel at Hudaismo, pero ang
kanilang kilos ay hindi ayon sa kanilang salita.
Mahalagang maunawaan
nating ang mga nasa posisyon upang umakay at gumabay ay kapwa
makapangyarihan at may impluwensya. Makapangyarihan dahil kaya nilang
idikta ang ikikilos ng mga tao. Maimpluwensya dahil kaya nilang
apektuhan ang iniisip at pananaw ng kanilang pinamamahalaan. Nakita
ng Panginoong Hesus ang kawalan ng katapatan at ang pagkukunwari ng
kanyang mga kaaway. Tandaan nating ang tagpong ito ay naganap matapos
na tangkain ng mga Pariseo na siluin ang Panginoon sa pamamagitan ng
pagtatanong na magdadala sa maling tugon. Nais ng mga Pariseo at
eskriba na sirain si Hesus at upang magawa ito, nais nilang
maimpluwensyahan ang mga tao na makisama sa kanilang galit at poot.
Inaanyayahan tayo ng
Panginoon na huwag tularan ang mga tao, maging kaakit-akit man o
kapana-panabik. Sa halip, ituon natin ang pansin sa natatangi at
nag-iisang Guro, Panginoon, at Ama. Pero sa panahong nating ito,
hindi ba ang dami nating idol na sinusundan sa kilos at gawa? Sino
nga ba ang ating pinakikinggan, hinahangaan at sinusundan? Tama ba
talagang sundan sila at tularan?
Bilang mga Kristiyano,
kailangan nating sundan lamang ang mga salita at halimbawa ng Diyos
na nakikita natin sa buhay at aral ng kanyang Anak na si Hesus.
