IKA-ANIM NA LINGGO NG PAGKABUHAY K
ANG MAPAYAPANG
ESPIRITU
Hindi ba sapat na wala nang
kapayapaan sa mundo? Tingnan lang sa tv, subaybayan sa radio, at tunghayan sa
internet. Kailangan pa bang pati sa ating puso, maramdaman din nating
nanganganib ang kapayapaan?
Araw-araw tayo nakikipagbuno
upang mapanatili ang kapayapaan ng puso at isip. Nagsisikap tayong maganap ito
sa ating mga mahal sa buhay at kaibigan. At kung tila nananalo na tayo, siya
namang biglang mababasag ang kapayapaang ating pinagsisikapan. Tandaan po
natin, lahat ng dahilan upang mawala ang kapayapaan ay mga masasamang dahilan. Mula
kasi ito sa galit, takot, tunggalian, pagmamataas, at kakulangan ng tiwala sa
sarili at lalo na sa Diyos.
Alam ng Panginoon na nais natin ang
kapayapaang dala ng mundo. Isang buhay na walang gusot, walang gulo, at puno ng
sagana at kapanatagan. Pero kund dumating man ito, tiyak na mabilis lang at
marupok pa rin.
Ngayon ipinapadala sa atin ng
Panginoong Muling Nabuhay ang kaloob niya at ng Ama. Iniaalay niya ang Espiritu
Santo na pangako noon at katuparan na ngayon. Ang Espiritu Santo, kasama ng Ama
at Anak sa iisang pagka-Diyos, ang magtuturo at magpapa-alala sa ating mga
tagasunod ni Hesus ng susi ng kapayapaan.
Habang nasa mundo si Hesus, ang mga
alagad ay nagsaya sa kanyang presensya. Lumakas sila sa kanyang mga salita. Tumatag
sila sa kanyang halimbawa. Ngayong kapiling na siya ng Ama, wala nang ugnayang
direkta at pisikal sa Panginoon. Pumasok na sa bagong landas ng
pananampalataya; ang paniniwala kahit walang nakikita. Dito rin pumapasok ang problema
natin. Marami ang kulang sa pananampalataya; marami ang marupok ang pananampalataya.
Dahil dito ipinagkakaloob sa atin
ang Espiritu Santo. Ipapaalala niya ang tagumpay ni Hesus. Ipapaalala niyang
siya ay nabuhay muli at nilupig ang kamatayan at kasamaan. Ituturo niya ang mga
landas ng pagtuklas sa Diyos na kaylapit sa atin at kaybuti sa atin
magpahanggang ngayon sa gitna man ng mga pagsubok natin sa buhay.
Paano mo nararanasan ang kawalan
ng kapayapaan ngayon? Saang bahagi ng buhay mo nadarama ang lungkot at siphayo?
Magsimula tayong magdebosyon sa Espiritu Santo, ang Diyos na nasa ating puso at
nag-uugnay sa atin sa Ama at sa Anak. Magtiwala sa kanya na aakayin kang muli
sa kapayapaan. Maniwalang dadalhin ka niya sa mas malalim na tiwala sa pag-ibig
at kapangyarihan ng Diyos.
(paki-share sa isang kaibigan ang blog na ito)
