SAINTS OF FEBRUARY: SANTA ESCOLASTICA
PEBRERO 10
SANTA
ESCOLASTICA, DALAGA
A.
KUWENTO NG BUHAY
Mula
pa sa unang aklat ng seryeng ito (pang-Adbiyento hanggang Bagong Taon), alam na
natin na may mga magkakaibigan na nagiging santo o mga magkakapatid o
magkakapamilya na nagiging santo. Pero kakaiba ang relasyon ni Santa
Escolastica at ng kanyang kapatid.
Silang dalawa ay ipinanganak na kambal. Kambal na santo at santa sa
iisang pamilya!
Si
Santa Escolastica at ang kanyang kapatid na si San Benito (St. Benedict) ay
ipinanganak sa Nursia, sa Italy noong taong 480. Sa simula pa lamang ng kanyang buhay ay nais na niyang ialay
ang buong sarili upang maging handog na malinis at marapat para sa Diyos. habang ang kanyang kapatid na si San
Benito ay nag-aaral sa Roma, si
Santa Escolastica naman ay naiwang kasama ng kanilang ama sa bahay.
Makikila
natin si San Benito sa sarili niyang kapistahan. Pero mainam na banggitin na
dito na si San Benito ang itinuturing na ama ng monastisismo sa Kanluran o sa
Europa. Ibig sabihin, malaki ang
impluwensya niya upang matatag bilang isang maayos na institusyon ang mga
monasteryo kung saan ang mga monghe at mga mongha ay mamumuhay nang ayon sa
kanilang pagnanasang manalangin, magtrabaho at mag-aral ng Salita ng Diyos.
Habang
isinasagawa ni San Benito ang kanyang misyon, inaakala na laging nakasunod din
sa kanya ang kanyang kambal na kapatid na si Santa Escolastica. Nang nasa
monasteryo sa Subiaco si San Benito, nasa isang monasteryo ng mga babae naman
si Santa Escolastica na hindi kalayuan. At nang itatag ni San Benito ang
monasteryo sa Montecasssino, sumunod naman si Santa Escolastica sa monasteryo
sa Piumarola.
Talagang
niyakap ni Santa Escolastica ang halimbawa ng kanyang kapatid. Nang magtatag ng isang grupo ng mga
monghe si San Benito, nagtatag din si Santa Escolastica ng isang grupo ng mga
mongha naman na sumunod din sa pamantayan ng buhay na ginawa ni San
Benito. Hanggang ngayon ay buhay
na buhay pa ang mga kilusan ng mga kababaihan sa simbahan na sumusunod sa buhay
ni Santa Escolastica. May mga
monasteryo at kumbento ng mga madreng o mongha na siya ang kinikilala bilang tagapagtatag
at inspirasyon.
Ayon
sa isang kuwento, bihirang magkita ang magkapatid na ito kaya minsan na
nagtagpo sila sa isang lugar sa labas ng kanilang mga monasteryo, nagkaroon
sila ng pagkakataong magpalitan ng kuro-kuro tungkol sa mga bagay na may kinalaman
sa Diyos.
Nang
panahon na upang maghiwalay sila at bumalik sa kanilang mga monasteryo,
nagpaalam na si San Benito pero ayaw pumayag ni Santa Escolastica dahil na rin
sa pananabik niyang makita at makausap ang kakambal niya. Pero mahigpit sa oras si San Benito at
gusto na talaga niyang umalis.
Naisipan
ni Santa Escolastica na magdasal. Pagkatapos niyang magdasal, ay bumuhos ang
malakas na ulan at hindi tuloy makaalis si San Benito. Ipinaliwanag ni Santa
Escolastica na nakiusap siya sa
kapatid, pero ayaw nitong pumayag na magtagal ng kaunti pa sa pag-uusap
nila. Kaya sa Diyos siya nakiusap at ang Diyos ang gumawa ng paraan. Nagulat si San Benito sa lakas ng
kapangyarihan ng panalangin ng kanyang kapatid.
Namatay
siya noong taong 547. Sinasabi na
nakita ni San Benito ang isang tanda ng pagkamatay ng kanyang kapatid nang
masulyapan niya ang isang kalapating lumilipad sa labas ng kanyang
bintana. Alam niyang ito ang
sagisag ng kaluluwa ng kanyang kakambal.
Sa
monasteryo ng Montecassino sa Italy ay makikita ang libingan ng
magkapatid. Sila na magkatabi sa
sinapupunan ng kanilang ina ay magkatabi ulit ngayon sa kanilang libingan.
B.
HAMON SA BUHAY
Minsan
ay nagiging problema natin ang sarili nating ka-pamilya o kasama sa bahay. Si
Santa Escolastica ay kumuha ng inspirasyon sa pananampalataya sa sarili niyang
kapatid. Ipagdasal natin na matapos na ang mga problema natin sa pamilya at sa
halip ay maging katuwang natin ang ating mga pamilya tungo sa paglago natin sa
kabanalan. Ipagdasal natin ang isang mahal sa buhay na ngayon ay nagbibigay sa
atin ng suliranin o alalahanin.
(mula sa aklat na "Isang Sulyap sa mga Santo, by Fr. RMarcos)
