UNANG LINGGO NG KUWARESMA
ANG PANGANIB NG TUKSO
Sa unang Linggo ng Kuwaresma, dinadala tayo ni Hesus
sa isang paglilibot sa disyerto ng mga tukso. Masarap isipin na pati siya ay
natukso din. Dahil dito may saysay ang mga tuksong hinaharap natin. Kung natukso ang Panginoon, normal lang
palang matukso din tayo ngayon sa ating buhay.
Dahil sa tukso, maaari tayong tumatag o humina. Maaari tayong maging kampiyon o
talunan. Maaari tayong lumakas o manlupaypay. Maaari tayong mapalapit o mapalayo sa Diyos.
Ang pinakapangit na tukso ay iyong maniwalang wala
na ang Diyos sa paligid natin. Dahil may naranasan kang masama, walang pakialam
ang Diyos. dahil may sakit ka, walang kapangyarihan ang Diyos. dahil nasaktan
ka at hinamak ng iba, walang Diyos na nagmamahal sa iyo.
Naranasan ito lahat ni Hesus. Sinikap ng demonyo na
kumbinsihin siya na ang Diyos ay isang malayo at walang pakialam na Ama. At
dahil dito, maaari nang sarilinin ni Hesus ang kanyang buhay at bawat
pasya. Pero alam ni Hesus kung
paano harapin ang tukso. May
kahinaan ang tukso – hindi ka kayang saktan nito kung hindi mo ito
paniniwalaan.
Humugot si Hesus mula sa kanyang karanasan ng
pag-ibig at katapatan at kabutihan ng Ama. Maaaring hindi niya nakita o nadama,
pero alam niya sa puso niya na naroroon ang Diyos at nagsasabing magtatagumpay
siya sa bawat tukso at bawat pagpupunyagi. Kung naniwala siya agad sa tukso, magiging mahina si Hesus
doon pa lamang. Dahil nilabanan niya ang tukso, umagos na tila baha ang
kapangyarihan ng Diyos Ama sa kanyang buhay.
Natutukso ka ba ngayon na tila wala nang Diyos o
tila wala na siyang pakialam sa buhay mo? Na iniwanan ka na niyang nag-iisa?
Kumapit sa Ama. Makinig sa kanyang tinig. Sumunod sa kanyang kalooban. Makiramdam
sa kanyang presensya. Maniwala ka sa Diyos at hindi sa bulong ng tukso. Magtatagumpay ka tulad ni Hesus!
